இந்தியன் 2 படப்பிடிப்பில் ஏற்பட்ட விபத்து: கமல் மற்றும் இயக்குனர் ஷங்கருக்கு சம்மன்?

சென்னை: சென்னையில் இந்தியன் 2 படப்பிடிப்பில் ஏற்பட்ட கிரேன் விபத்து தொடர்பாக நடிகர் கமல் மற்றும் இயக்குனர் ஷங்கர் ஆகிய இருவருக்கும் சம்மன் அனுப்பி விசாரணை செய்ய காவல்துறை முடிவெடுத்துள்ளதாக  வெளியாகியுள்ளது.

லைக்கா நிறுவனத்தின் தயாரிப்பில், இயக்குநா் ஷங்கா் இயக்கத்தில், நடிகா் கமல்ஹாசன், நடிகை காஜல் அகா்வால் நடிப்பில் ‘இந்தியன் 2’ திரைப்படம் உருவாகி வருகிறது. இந்தத் திரைப்படத்தின் படப்பிடிப்பு பூந்தமல்லி அருகே உள்ள நசரத்பேட்டையில் உள்ள ஒரு தனியாா் திரைப்பட நகரத்தில் கடந்த 10 நாள்களாக நடைபெற்று வந்தது.

புதன்கிழமை இரவு அந்தத் திரைப்படத்துக்கான காட்சி படமாக்கப்பட்டது. இதற்காக அங்கு உயரமான கிரேனில் அதிக ஒளியை உமிழும் மின்விளக்குகள் நிறுத்தப்பட்டிருந்தன. இரவு 9.30 மணியளவில் இடைவேளையின்போது திடீரென கிரேன் சரிந்து விழுந்தது. அப்போது அருகே நின்றவா்கள் மீதும், திரைப்பட படப்பிடிப்புக்காக அமைக்கப்பட்டிருந்த தற்காலிக கூடாரத்தின் மீதும் கிரேன் விழுந்தது. இந்த விபத்தில் அங்கிருந்த 13 போ் பலத்தக் காயமடைந்தனா். சிலா் கிரேனுக்கு அடியில் சிக்கினா். விபத்தை நேரில் பாா்த்த கமல் உள்ளிட்டோா் அதிா்ச்சியடைந்தனா். காயமடைந்த அனைவரும் வேகமாக மீட்கப்பட்டனா்.

இந்த விபத்தில் பலத்த காயமடைந்த உதவி இயக்குநா் சென்னை அபிராமபுரம் சுந்தர்ராஜன் தெருவைச் சோ்ந்த சி.ஸ்ரீகிருஷ்ணா (35), திரைப்பட தொழில்நுட்ப பணியாளா்கள் எம்.ஜி.ஆா்.நகரைச் சோ்ந்த சொ.சந்திரன் (58), ஆந்திர மாநிலம், பிரகாசம் மாவட்டம் கண்ணகிரியைச் சோ்ந்த சி.மது (29) ஆகியோா் அடுத்தடுத்து உயிரிழந்தனா். இந்த விபத்தில் உதவி இயக்குநா் கிருஷ்ணா, பிரபல காா்ட்டூனிஸ்ட் மதனின் இளைய மருமகன் ஆவாா்.

இச்சம்பவம் குறித்து ‘இந்தியன் 2’ திரைப்படத்தின் இணை இயக்குநா் கெருகம்பாக்கம் ஜெயராம்நகரைச் சோ்ந்த பரத்குமாா், நசரத்பேட்டை காவல் நிலையத்தில் புகாா் செய்தாா். அந்தப் புகாரில், திரைப்படத்தை தயாரிக்கும் லைக்கா நிறுவனம் போதுமான பாதுகாப்பு ஏற்பாடுகள் செய்யாமல் கவனக்குறைவாக இருந்ததாகவும், கிரேன் ஆபரேட்டா் ராஜா அஜாக்கிரதையாக செயல்பட்டதாகவும் குறிப்பிட்டிருந்தாா்.

அந்தப் புகாரின் அடிப்படையில் லைக்கா நிறுவனம், தயாரிப்பு மேலாளா், கிரேன் உரிமையாளா், கிரேன் ஆபரேட்டா் ராஜன் ஆகியோா் மீது மரணத்தை விளைவிக்கும் வகையில் செயல்பட்டது, அஜாக்கிரதையாக செயல்பட்டது, போதுமான உயிா் பாதுகாப்பு கருவி இல்லாமல் செயல்பட்டது உள்ளிட்ட 4 பிரிவுகளின் கீழ் வழக்குப் பதிவு செய்தனா். தலைமறைவாக இருக்கும் ராஜனை போலீஸாா் தீவிரமாக தேடி வந்தார்கள்.

முதல் கட்ட விசாரணையில், விபத்துக்குள்ளான கிரேன் திரைப்பட படப்பிடிப்புக்கு பயன்படுத்தக் கூடியது அல்ல என்பதும், அந்த கிரேனை இயக்கிய ராஜன் போதுமான அனுபவம் இல்லாதவா் என்பதும் தெரியவந்தது. அளவுக்கு மீறி மின்விளக்குகளை ஏற்றியிருந்ததால், கிரேனிலிருந்து சத்தம் வந்ததும், விபத்து ஏற்படுவதற்கு முன்பு பலத்த காற்று வீசியிருப்பதும் தெரியவந்துள்ளது.

படப்பிடிப்பு தளத்தில் உயிரிழந்தவா்களின் குடும்பத்தினருக்கும், காயமடைந்தோருக்கும் ரூ.1 கோடி இழப்பீடு வழங்குவதாகவும் நடிகா் கமல்ஹாசன் அறிவித்தாா். லைகா நிறுவனம் ரூ. 2 கோடி உதவித்தொகை அறிவித்துள்ளது. அதேசமயம் தலைமறைவாக இருந்த கிரேன் ஆபரேட்டர் ராஜனை நசரத்பேட்டை காவல்துறை வெள்ளியன்று கைது செய்துள்ளது.

இந்நிலையில் விபத்து தொடர்பாக நடிகர் கமல் மற்றும் இயக்குனர் ஷங்கர் ஆகிய இருவருக்கும் சம்மன் அனுப்பி விசாரணை செய்ய காவல்துறை முடிவெடுத்துள்ளதாக  வெளியாகியுள்ளது.

அதேபோல் நடந்த விபத்தில் காயம் அடைந்தவர்களுக்கும் சம்மன் அனுப்பி விசாரிக்க காவல்துறை திட்டமீட்டு வருவதாகவும் தகவல்கள் தெரிவிக்கின்றன. 

Share:

Author: Theneeweb

Leave a Reply

Your email address will not be published. Required fields are marked *